Eng Upassung vum Contingent ass méi wéi iwwerfälleg

Wéi all Joer sëtzen d’Membere vun de Schoulcomitéen elo nees zesumme fir d’Schoulorganisatioun opzestellen. Den aktuelle Contingent-System fir d’Zoudeelung vu personelle Ressourcë féiert och dëst Joer erëm zu grousser Onzefriddenheet an zu Frustratioun. All Joer sti Schoulcomitéen an Enseignantë virun der schwéierer Entscheedung: Méi Appui an Hëllefsmesuren ubidden oder méi kleng Klasse schafen? Béides gläichzäiteg ass am aktuelle System a ville Schoule kaum ëmsetzbar, wéi den OEJQS bestätegt ^[i].  Dës limitéiert Flexibilitéit zwéngt d’Schoulen ëmmer erëm zu Decisiounen, déi zu Laaschte vun de Schüler:innen an hire Bildungschancë ginn.

Den OEJQS confirméiert a sengem Rapport zur Evaluatioun vun der Schoulreform vun 2009 ^[ii] souguer, dass déi virgesinnen zousätzlech 20% Ressourcë fir Schoule mat engem niddregen sozialen Index bei Wäitem net duer ginn, fir gerecht an effikass op d’Bedierfnisser vun de Schüler:innen anzegoen. Dëst deckt sech mat dem, wat mir dagdeeglech um Terrain feststellen.

Grad elo, wou eis Schoulen duerch d’Inklusioun viru grouss Erausfuerderunge gestallt ginn, wou en neie Curriculum kënnt, en neie Mathematik-Programm agefouert gëtt an och nach de Projet Alpha zäitno ëmgesat gi soll, ass et méi wichteg wéi jee, eis Schoulen ze stäerken an hinnen déi néideg Ressourcen zur Verfügung ze stellen.

Als SEW/OGBL fuerdere mir de Bildungsministère mat Nodrock op, de Contingent-System grondleeënd ze iwwerdenken an no uewen unzepassen. Eis Schoule brauchen Handlungsspillraum, fir flexibel an zilorientéiert op d’Bedierfnesser vun hire Schüler:innen reagéieren ze kënnen.

Et ass héich Zäit fir een iwwerschafften a méi gerechte Contingent-System – fir d’Wuel vun alle Schüler:innen an Enseignanten!

Matgedeelt vum Syndikat Erzéiung a Wëssenschaft am OGBL (SEW/OGBL),
den 20. Mäerz 2025

[i] « De fait, la perte des moyens additionnels pour mettre en œuvre le coenseignement ou pour proposer des mesures d’appui individualisé aux élèves en difficultés — une doléance souvent évoquée par les instituteurs lorsqu’ils parlent du contingent — provient en réalité des choix opérés par les comités d’école et par les communes dans la gestion des ressources allouées pour établir l’organisation scolaire. » OEJQS. (2024). Évaluation de la réforme scolaire de 2009 : Recommandations de l’OEJQS pour un meilleur fonctionnement de l’enseignement fondamental et une amélioration de la qualité scolaire. Rapport thématique. Walferdange : Observatoire national de l’enfance, de la jeunesse et de la qualité scolaire, page 27.

[ii]  « „(…) si l’on tient compte des inégalités croissantes au sein de la population scolaire (découlant de l’hétérogénité linguistique grandissante des élèves et des écarts de revenus de plus en plus importants), il serait judicieux d’envisager l’augmentation du plafond de l’indice social au-delà des 20% en insistant sur le fait que le complément de ressources soit utilisé au développement des mesures d’appui et de soutien pédagogiques (…) » Ibid. page 29.